الغربة

يا ثگل جنطة غربتي البیها بس عمري التبده اعله المحطة
المسحة ارسومي و كحلتي
البيها اخر شارع اليوميلي ردي
سفرة الغربة گباحة
مرود الغربه عمه و مابي سواد
صبخه جيعان الحلم مامن حصاد
ردي ردي
سچة الغربه عثر
و انتي وردة مزهريه الجدمچ الشابع دلال
وينچ و وين السفر

امراية الغربة مكر
لعبة امحيبس على اچتاف الزغل
ردي ردي
في شجرهم غربه مايشبه نخلنا
افياي بس ينگط خناجر
الغربه يا بنت العرب غرفة طفل عد بيت عاجر
اهناك لو ضاجة شبابيچ العصر مامن قصیده اتجیبلچ فنجان من کوسر هلچ
مامن امچ تظفر احلامچ فجر
بیت طین امعطر افطوره المطر
لا حرز یضويلچ اعيون الدروب
لا گصب يعزفلچ اطوار الجنوب
اخ يا ضيم الجنوب
ردي و نزعي تراچیهم ثگل
ردي و نزعي گلایدهم ثگل
المو الچ کلش ثگل
المو الچ کلهن ثگل
ردي واتباهي ابتراچي اخيوط بيضه البيها يتباهه الشرف
ردي چلمة خير و مضحكة الظرف
ردي و اتباهي ابگلاید ململ الجایبها ابوچ من التعب
من تعب حمل الجواني
الليل ظالم عالجرح يعزف أغاني
ردي ردي
سفرة الغربه گباحة

زهرا جبار الاهوازیة