قصيدة وجدان نائم

چلمه طاحت من حلگ بطران شبابع
و ترست اذان الجوامع و الشوارع والمزارع
کلها رکضت
الناس ركضت
الديره ركضت
حتى طوفتنه الفقيره الماكله العرضه عمرها
حتى ام ذاك الشباب المات حارس للوطن التسكر الغبشه بضحكته
عافت الكاس و خمرها
كلها تركض
حتى شارعنا الفقير العايش ابصبخة ملح
المزرعه الماتت عطش واتشكلت لوعة فلح
الكوخ يركض للصلح
جارتي البيّد عبايتها النفط والسوگ ركضت
صابر السرقو مواعينه العصر زلم السياسه و فرهدو بسطيته گوه
ابحرگه یرکض
حتى كلبسول الاكسيجن راح يركض لهفه لاكن مختنگ
كلها تركض
عافني ابراس الشطر نقطه و ركض حتى القلم
ديره متروسه الم
و وصلو الاخر محطة و اذنت طول المناير
حاير اليدفعله حاير
حاير اليسئله حاير
راح شبعان السلف فوگ المنابر
عابر اليسحگله عابر
قال بسم الباري ذاك الخالق الناس
مالك الناس
آنا منكم
آنا ابنكم
ادري شنهو الجوع يعني
العوز يعني
قال مولانه علي
لو رجل كان الفقر حتما قتلتة
راح اشيل اچفوفي لله واندعي ايشيل الحصار
والغبار
كلها ردت
ايست والناس ردت
الديره ردت
الطوفه ردت
صابر السرقو مواعينه العصر زلم السياسه
رد يتچي للشوارع
الي تحلم کل عمرها جیر و اشویة شجر
المزرعه الفزعة فلح، ردت صبخ وبلا نهر
النخله تحچي بالسفر
جارتي التعبانه ردت بس سمل وابلا حریر
اشگد هزیمه اشگد مریر
مات کپسول الکسجن
مختنگ نص الوطن
و نام شبعان السلف وبلا ضمیر

١٩ اوريل ٢٠٢١